అవార్డులొచ్చే కవిత్వం రాయడం ఎలా? - 4
ఇంత చాదస్తంతో నువ్వు నానావాదాల కవిత్వం ఏం రాస్తావ్‌?
సెక్యులర్ కవిత్వం రాసి జనాలను ఎలా మానేజ్‌ చేస్తావ్?
ఓ పని చెయ్‌, నీలాంటి చాదస్తులకు అవార్డులు తెచ్చుకోగల మరో మంచి ఉపాయం ఉంది. అదేంటంటే, ప్రస్తుతం ట్రెండింగ్ లో ఉన్న కవిత్వరూపాలను కాచ్‌ చేసి కాష్‌ చేసుకోవడం.
చెత్త మీద
వాలిన ఈగ
మనసు
ఇలా రాయాలి. బావుందా?
ఒక ముక్కే చెప్పి బావుందా అంటావే? ఇంకా చెప్పు.
ఇంతే కవిత. వీటిని మిడ్డీలంటారు.
మిడ్డీలా??
మినీ కవితలు. ఇంకో మిడ్డీ చూడు-
కోతికి
కొబ్బరి చిప్ప
సెల్‌ ఫోన్‌
బావుందా? నిగూఢమైన అర్థం, అతి తక్కువ మాటల్లో.
ఇది చూడు-
కాకికి
కాకే!
ఇదేమిటి? ఇందాకటిదానికన్నా చిన్నగా ఉంది?
వీటిని చెడ్డీలంటారు. చిట్టి కవితలన్న మాట.
కన్నుకి
కన్నా?
ఇలాగన్న మాట. అల్పాక్షరాలలో అనంతార్థం!
అవార్డులే అవార్డులు!
బాబోయ్‌, నీ అవార్డులకో నమస్కారం. నన్నొదిలి పెట్టు.
ఓకే, మిడ్డీలు, చెడ్డీలు వద్దంటున్నావ్‌ కాబట్టి దీర్ఘ కవిత ట్ర్రై చెయ్‌. గత పదేళ్ళుగా వచ్చిన వార్తాపత్రికల్లోని ముఖ్యమైన వార్తలు తీసుకుని గుదిగుచ్చావంటే దీర్ఘ కవిత తయారు!
ఏదో భోజనం తయార్‌! అన్నట్టు చెబుతున్నావేరా?
అదంతేలే. ఉదాహరణ ఇస్తా విను -
చీరాల్లో
దోపిడీలు
పేరాల్లో
చోరీలు
అనంతపురం
హత్యలు
గణపవరం
కాల్పులు
ఘోరాలు
నేరాలు
ఎటుపోతోందీ దేశం?
కాకినాడ ఎక్సప్రెస్‌లో
జేబుదొంగ కలకలం
పాలకొల్లు వీథుల్లో
కత్తిపోట్ల దారుణం
విదేశీ హస్తముందంటే
కాదంటారా నేతలు?
…
ఇలా నానా వార్తలన్నీ కుట్టుకుపో. సుదీర్ఘ కవిత రెడీ. మెదటి పేజీలో ఏం చదివాడో రెండో పేజీకి వచ్చేప్పటికి పాఠకుడు మర్చిపోతాడు కాబట్టి నో ప్రాబ్లెం. మినిమం నాలుగు అవార్డులు వచ్చిపడతాయి. ఆలోచించు.
ఈ గొలుసుకట్లు అల్లడం, దండకాలు రాయడం నావల్ల కాదురా!
సరే, ఇంకో సూపర్‌ ఐడియా ఇస్తా. అనువాదాలకీ చాలా గిరాకీ ఉంది. సుప్రసిద్ధ కవితలు తీసుకుని అనువాదాలు చెయ్‌. అవార్డులు కొట్టు. ఓకే?
Salt
Camphor
look alike
you see
you see
tastes
separate!
ఇలాగన్న మాట.
దేనికి ఇది అనువాదం??
గుర్తుపట్టలేదా?
ఉప్పు కప్పురంబు ఒక్క పోలికనుండు!
Yes,It’s True
Yes, It’s True
Yes, It’s True
You said
You said
You said
true true!
అవును నిజం
అవును నిజం
అవును నిజం
నీవన్నది
నీవన్నది
నీవన్నది
నిజం నిజం!
అదన్న మాట.
Not a single
Piece of weight,
Brave inversed!
లావొక్కింతయు లేదు
ధైర్యము విలోలంబయ్యె!
ఓకే? ఈ స్టైల్‌ ని తాతాచారి టైపు అనువాదాలంటారు. ఇలా అనువాదాలు చేస్తే చాలు, బీభత్స అకాడెమీ వారు అవార్డు ఇస్తారు. సరేనా?
అవార్డుల గురించి ఐడియాలు బానే ఉన్నాయి గానీ పోతనకు, కాళిదాసుకు ఎవరు అవార్డులిచ్చార్రా?
కవిత్వం దైవదత్తం. బాహ్య కారణాల కోసం కవిత్వాన్ని వాడ్డం అసహ్యం.
ఇలాగే చాదస్తంగా మడి కట్టుక్కూచో. అవార్డులన్నీ వేరే వాళ్ళు కొట్టుకుపోతారు. మర్చిపోయా. మడి అంటే గుర్తొచ్చింది. నీ కవితల్లో ఎక్కడా సంస్కృత పదాలు రాకుండా చూసుకో. ఓకే? లేకపోతే అది బ్రాహ్మణ మనువాదమౌతుంది.
ఎక్కడ వీలైతే అక్కడ డగలాయి ప్రభువులు మనకు ప్రసాదించిన బాషా వాడు. అప్పుడది సెక్యులర్.
డగలాయి బాషా + స్థానిక యాస = సెక్యులర్. ఇదీ ఫార్ములా. ఓకే?
నీ వంక
సూస్తాంటే
యాదోంకీ
బారాత్‌
బారాత్‌ మే
కుషామత్‌ కీ
కుర్బానీ
మొహబ్బత్ కీ
దుకాన్‌ మే
నువ్వూ నేను
జాజి మల్లి
అడుసు మిల్లి
గోడ మీద బల్లి
ఖుషీ ఖుషీ!
ఇలా రాస్తే సరస్వతీ సమ్మానం కూడా ఇస్తారు. తెలుసుకో.
హరి!హరీ! అది సరస్వతీ దేవికే అవమానం! ఇలాంటి కవిత్వాలు రాసిన వాళ్ళు వచ్చే జన్మలో పుస్తకాలు కొట్టేసే చెద పురుగులై పుడతారని శపిస్తున్నా!
ఏడిశావులే.వచ్చే జన్మ సంగతి ఎందుకూ? ఈ జన్మలో అవార్డులు వస్తున్నాయా లేదా అది చూసుకో.